Heb 11 | YML | STEP | Vetumagana side bani'odi. Naninidi nuanuada kebu ta da veluagadiga siwe ta 'aseta-'afo'afoi 'awaie ta na veluagadi, wata ava'ai kebu ta da 'ise'isediga siwe ta nuani mogitana ta na veluagadi, yada nuanuanina 'ana wagava vetumagana.

Hebrews 11

Vetumagana faifaina.

1 Vetumagana side bani'odi. Naninidi nuanuada kebu ta da veluagadiga siwe ta 'aseta-'afo'afoi 'awaie ta na veluagadi, wata ava'ai kebu ta da 'ise'isediga siwe ta nuani mogitana ta na veluagadi, yada nuanuanina 'ana wagava vetumagana. 2 Basenadiotoga 'ifwaidi tubudavo ma yadi vetumagana fa'alina, bega yadi vetumagananidi 'waidiega Yaubada i awave'atumaiedi.

3 Fai ta vetumagana Yaubada 'waineye ta 'asetai fwayafwaya, abama wata nani matatabuna i 'idewadi yana vona 'wainega, we'e ava'ai 'asiau ta 'ise'isediga, 'waidiega i 'idewadi kebu 'ada fata ta na 'isediga.

S1 2 Kol 5:6-7S3 Nag 1:1

Me Isileli tubudiavo Ebeli, Inoki wata Noa

yadi vetumagana ifufuna.

4 Tomotoga 'ifwaidi ma yadi vetumagana side bani'odi. Basenadiotoga Ebeli i vetumagana Yaubada 'waineye begaidi yana 'anivelena-maimaiga 'aisaya sifi i velomuyeni Yaubada 'waineye, faifaina Yaubada i sosoana bega i awave'atumaieni. We'e tatana Keni yana 'anivelena-maimaiga 'ani'ani, bega Yaubada kebu i da sosoana wata i da awave'atumaieniga. Fai Ebeli tovetumagana, tutuyanina Yaubada i awave'atumaieniga wata i vo, Taunina tomogo yana sauluva tonovidi matakuye.” Avinodi Ebeli i wafa siwe yana vetumagana ifuifufuna i 'eno'eno 'asiau yada 'eba 'isa.

5 Wata Inoki i vetumagana Yaubada 'waineye bega kebu i da wafaga, Yaubada i vagavaiamo i naweni 'waineye, tomogona i luala-wayogeni. Bola kebu i da lakaga, faifaina Yaubada i awave'atumaieni i vo, A sosoana Inoki faifaina.” 6 'Ai'edi kebu ma yada vetumaganaga wata kebu 'ana fata Yaubada i na sosoana faifaida. 'Ai'edi aitoi nuanuana i na nago Yaubada 'waineye i lubwaineni i na vetumagana Yaubada i miamia, wata i lubwaineni i na vetumagana Yaubada i vevesauluva 'atumaina tomotoganidi i lulualeniga 'waidie.

7 Tamu wata tomogo 'ana wagava Noa i vetumagana Yaubada 'waineye bega ava'ai 'awaie i na souyediga faifaidi i matakia 'waineye yana vona i ve'ililibuyeni, ma yana kololo waka i yogoni. 'Wei wata mwai bwaikina bola kebu i da souyediga siwe i vematayakayakamo. Wakanina 'wainega ma yana 'aila'a 'ita'ita'i i veluagai mwai bwaikaotogina 'wainega. Tomotoga 'ifwaidi kebu i da vetumagana bega Noa yana vetumaganayega yadi sauluva sakoidi i sivemagesedi we'e yana vetumagananina faifaina Yaubada i vo, Noa yana sauluva tonovidi matakuye.”

S4 Nag 4:3-5S5 Nag 5:24S7 Nag 6:13-22

Ebelamo yana vetumagana ifuifufuna.

8 Basenadi Yaubada Ebelamo i goleni 'ana tuvada i na baileni i na nago 'ani'ie tamu 'awalawa 'waineye, 'awalawanina Yaubada i vona'awaufaufa Ebelamo i na veleni. Ebelamo Yaubada yana vona i vetumaganeni bega i vematayakayaka i tovoi i nago siwe bei i nunagoga kebu i da 'asetaiga. 9 Ma yana vetumagana i mia vona'awaufaufa 'awalawina 'waineye, siwe kebu yana vanugaga, vadavada i 'idewadi 'aisaya bunudiega, wakawaka bani'odi i miamia. We'e mulieta Yaubada vona'awaufaufanina i luvaitugani Ebelamo natuna Aisake wata tubuna Iakobo 'waidie, fwayafwayanina i na veledi, siwe taunidi Ebelamo bani'odi vadavada 'waidie i mia. 10 Ebelamo i miamia vadavada 'waidie, fai i lulukamata nuanuana i na luku abame Yaubada yana 'atamana miamia-vagaina 'waineye. 'Atamananina nagami Yaubada yana nuanua 'waineye i venua'ivina-vagaseni mulieta i 'idewai.

11 Ebelamo ma yana vetumagana bega avinodi i ve'auvea wata Sela kakalidi, siwe Yaubada yana toketokena 'wainega i venatuna. I venatunaga fai Yaubada yana vona'awaufaufa Ebelamo yana 'aila'a i na vefue, vonanina Ebelamo i vetumaganeni, i nuani mogitana i na 'idewai. 12 Ebelamo i ve'auvea-'afo'afo sai'afoga i da wafa siwe fai i vetumagana, tomogonina 'aitamogana 'wainega 'aila'a bwaikaotogina i souyedi, lu'iawawa-wayoga wala'ai 'ana 'ilukulukuta bani'odi wata 'ubwana.

13 Tomotoganidi faifaidi a vonavonaga, matatabudi ma yadi vetumagana i wafa. Bola ma yawaidie naninidi Yaubada i na velediga faifaidi i vona'awaufaufa, siwe kebu matatabuna i da veluagadi. Ma yadi vetumagana i nuanidimo mogitana 'awaie i na souyediga faifaidi i sosoanamo. I vonavona mali tomotoga 'waidie, fwayefwayeye kebu yadi vanuga taunidi wakawaka wata toyaba. 14 Fai taunidi i fali-wakewakediga ta 'asetai taunidi yadi 'awalawa fwayefwayeye kebu faifaina i da nuanua we'e mogitana 'awalawa abame i nuanuani, faifaina i lulukamata. 15 'Ai'edi 'adi tuvada faifaina i da nuanuaga 'adi fata wata i da viladi siwe yadi nuanua bwaikina tamu 'awalawa 'atumaiotogina, 'awalawanina abame. Ebelamo ma yana 'aila'a nuanuadi Yaubada taiadi i na miamia, begaidi avinodi Yaubada bwaikaotogina siwe tutuyanina tomotoganidi i vo, 'Omu yama Yaubada,” taunina kebu i da bunumayagediga fai 'akonadi tamu 'atamana i 'idewa-vagaseni faifaidi abame.

17 Tamu tutuya Yaubada Ebelamo i silubuya nuanuana natuna i na velomuyeni 'waineye, Ebelamo kebu nuana i da loloi ma yana vetumagana i vematayakayaka. Avinodi Yaubada i vona'awaufaufa Ebelamo 'waineye yana 'aila'a i na vefue Aisake 'wainega, siwe Ebelamo igodi natuna yana tamogana i da luvewafai 'eba velomu 'waineye. 19 Ebelamo i nuani mogitana bega i vo, 'Ai'edi natuku a na luvewafai a na velomuyeni Yaubada 'waineye, 'ana fata wata i na sivetovoia wafayega.” Sai'afoga i da luvewafai siwe Yaubada i talaboda bega 'wa da vo wafayega i da vevilai.

S8 Nag 12:1-5S11 Nag 15:6S12 Nag 15:5
S17-18 Nag 22:9-12

Aisake, Iakobo wata Iosefa yadi vetumagana ifuifufuna.

20 Aisake i vetumagana Yaubada 'waineye bega i nuani mogitana tutuya mulina i na vesauluva 'atumaina natunavo 'waidie. Begaidi Iakobo wata Iso 'adi vona nuakalikali 'waineye, Aisake i velu'ui Yaubada 'waineye natunavonidi faifaidi.

21 Wata bani'odi Iakobo i vetumagana Yaubada 'waineye bega sai'afoga i na wafa yana wautoganayega i 'a'alive'avinana Yaubada i subisubiai, wata Iosefa natunavo 'adi vona nuakalikali faifaina i vevelu'ui bega Yaubada i na vesauluva 'atumaina 'waidie.

22 Mulieta Iosefa i 'asetai sai'afoga i na wafa i vetumagana 'awaie Yaubada me Isileli i na viledi Itifita 'wainega, bega i vona-vagata i na tautauyaga luluna i na nawedi.

S20 Nag 27:27-29,39-40S21 Nag 48:15-16S22 Nag 50:24-25

Mosese yana vetumagana ifuifufuna.

23 Mosese tamana inana taiadi wata ma yadi vetumagana. Yadi tutuye Itifita 'ana kini yana veimea nuanuana kwakwama mwedamwedalidi iavetadi i na luluvewafadi siwe tutuyanina natudi i tubuga i 'iseni 'ana 'isa 'atumaiotogina bega kebu i da kolologa kini yana veimeanina faifaina. I vetumagana Yaubada i na 'ita'ita'ieni bega i giveni vanuge, bei i miamia weta'i 'aitonu.

24 Mulieta me Itifita yadi kini natuna vevinena Mosese i veluagai i naweni yana vanuge i fayayeni. Mosese i taulai ma yana veimea wata yana 'ai'aiwabu fuedi fai taunina bani'odi kini tubuna. Siwe i vetumagana Yaubada 'waineye bega kebu nuanuana tutuya 'ale'usana nageneye taiadi i na miamia i na sosoana-'avo'avovo wata i na sakosakona, nuanuana enavo Yaubada yana tomotoga, kumanidiavo i vetofolova-maimaiga me Itifita 'waidie, taiadi 'adi vita i na vesala. 26 Awavesako wata sidibidibi faifaidi kebu i da nuanua, i nuani 'ai'edi vita i na veluagai Yaubada 'ana Venua'ivina faifaina nani 'atumaina, fai i vetumagana 'awaie 'ana tutula miamia-vagaina i na veluagai Yaubada 'wainega, 'ai'aiwabunidi bwaikaotogidi me Itifita yadi 'ai'aiwabu kebu bani'odiga.

27 Fai Mosese i vetumagana Yaubada 'waineye kebu i da kololo kini i na nuasakoga faifaina, i tovoi Itifita 'wainega i tauya i nago. Kebu i da vilai, ma yana tokemaiga i nago, Yaubada kumanina kebu tamu aitoi 'ana fata i na 'iseniga, 'wa da vo i da 'ise'iseni. 28 Wata fai i vetumagana Yaubada yana tomotoga me Isileli i na 'ita'ita'iedi, bega Yaubada yana vona i lu'ivoneyeni 'waidie, i vonedi 'aisaya sifi i na nikedi yadi saiboda lilivadi i na luitaitalidi dayagidiega. I luitaitalidiga bega Yaubada yana anelose i uvi'agalatagonidi kebu i da nikedi we'e me Itifita natudiavo tulaidi i luvewafadi.

S23 Sou 1:22, 2:1-2S24 Sou 2:10S27 Sou 12:51
S28 Sou 12:21-23

Me Isileli yadi souyagi ifuifufuna.

29 Tutuyanina Mosese me Isileli i vagavaidi i souyedi Itifita 'wainega, me Itifita i tala'wavina mulidie. Fai me Isileli i vetumagana Yaubada 'waineye Eyaga Yamoyamoina i 'ivelalai, 'waineamo i damana 'wa da vo fwayafwaya lalaneamo, we'e me Itifita igodi i da damana i na 'ive'avinidiga faifaina, nika matatabudi i yemuwafa.

30 Mulieta malamala fuedi i 'a'avana me Isileli i le'wai Kenani, 'awalawanina Yaubada i vona'awaufeufeniga 'waineye Yaubada yana veimea 'wainega nuanuadi 'atamana Ieliko i na kuali, bega Yaubada yana vonanina i vetumaganeni 'aiata 7 nagedie 'atamananina 'ana kali badubaduna wata manamanawena i luvivili. Fai ma yadi vetumagana lauvivila 'ana ve-7 'waineye kali i 'aniweali.

31 Bola 'atamananina kebu i da leodiga tamu vavine toalagogona 'adi wagava Leabi me Isileli yadi tovetaui'wala i 'ivaisedi i givedi yadi vanuge. Fai i vetumagana Yaubada 'waineye, tutuyanina i tala'avuidiga vavinenidi 'atumai'avadi i miamia, kebu i da wafa Yaubada 'ana tovedumwe'ai'ai taiadi.

32 Tovetumagana fuedi wata i miamiani siwe a nuani 'asa'aiana. 'Ai'edi wata nuanuaku, side tovetumagananidi a da veifufuyedi, Gidioni, Beleki, Samisoni, Iefeta, Devida, Samuela, wata Yaubada yana tolu'ivonavo. 33 Tomotoganidi i vetumagana Yaubada 'waineye bega 'eba veimea 'ifwaidi taiadi i vetalaga i leodi, yadi veimea tonovidi, wata ava'ai Yaubada i vona'awaufaufaga 'waidie i veluagadi. Fai ma yadi vetumagana Yaubada 'waineye i 'ita'ita'iedi 'aisaya kasikasisidi laioni 'waidiega, 'ai-'ala'alata 'wainega, wata vetalaga 'waidie kebu tamu aitoi i da wafa kefata 'waidiega. Nagami kebu toketokediga siwe i vetoketoke i vemata'ai'ai vetalaga 'waidie bega mali tomotoga yadi tolugaviavo 'waidie i vetoketoke. 35 We'e vevine 'ifwaidi yadi vetumagana 'wainega ediavo wafawafadi i yawasa.

We'e tomotoga 'ifwaidi i vetumagana Yaubada 'waineye siwe 'adi tovedumwe'ai'ai i 'ivekokovidi i wafa. Kebu nuanuadi Yaubada i na baileni bega tovedumwe'ai'ainidi i na 'etoyavudi vita 'waidiega, ma yadi tokemaiga i tauyedi veviga wata wafa 'waidie. I vetumagana i 'asetai 'awaie mia 'atumaina wata miamia-vagaina i na veluagai, yadi mia fwayefwayeye kebu bani'odiga. 36 'Ifwaidi 'adi gaviavo i sidibidibiedi wata i fitalidi, we'e 'ifwaidi i yogonidi bulava kainumu 'waidiega i yatodi vanuga 'eba yogona 'waineye. 37 'Ifwaidi fai i vetumagana Yaubada 'waineye kileuyega i tutuvewafadi, 'ifwaidi soa 'wainega i bobolugedi, we'e 'ifwaidi i luvewafadi kefatayega. 'Ifwaidi i 'ivekokovidi wata vita i veledi, taunidi i vewekowekoma, i ve'wesena 'aisaya sifi wata goti bunudiega. 38 Taunidi tomotoga 'atumaiotogidi, kebu i da lubwainedi tomia fwayafwaya 'ifwaidi sakoidi taiadi i na miamia. Kebu yadi vanuga, i mimiayaba-vuvua sali'avu'avuye wata 'oyeye, yadi 'eba mia ovuye wata vatu'ai 'waidie.

39 Tomotoganidi Yaubada i awave'atumaiedi yadi vetumagana fa'alidi faifaidi, we'e naninidi faifaidi i vona'awaufaufa i na velediga, fwayefwayeye kebu i da veluagadiga. 40 Kebu i da veluagadiga fai Yaubada nuanuana i na lukamata bega ma fuedeye yana nuanua 'atumaiotogina ta na veluagai, bega matatabuda yada sauluva magemagetadi mataneye.

S29 Sou 14:21-31S30 Ios 6:12-21S31 Ios 2:1-21, 6:25
S33 Dan 6:22S34 Dan 3:23-27S35 1 Kin 17:17-24 2 Kin 4:18-37
S36 Iel 20:2, 37:15-16